ඔපෙරා බ්‍රව්සරයෙන් සිංහල කියවන හැටි

හැමෝම දකින්න ඇතිනේ මම කලින් ලියලා තිබුණා ඔපෙරා බ්‍රවුසරයේ 5 වන සංස්කරණය ගැන. ඒකෙදි මම පෙන්වලා තිබුණා ඒ මොබයිල් බ්‍රවුසර් එකෙන් සිංහල කියවන්න පුළුවන් කියන එක. අද මම කියන්න යන්නේ ඒක කරන්නේ කොහොමද කියන එක. ඒක ඒ තරම් අපහසු දෙයක් නෙවෙයි. වැඩේට යන්නේ නෑ විනාඩියක්. ඇත්තටම මට මේක ගැන කිව්වේ මගේ මිත්‍රයෙක්. ඒක ඔයාලටත් වැදගත් වෙයි කියලා හිතුන නිසා ලියන්න හිතුවා. බ්‍රවුසරය සිංහල කියවන්න පුළුවන් විදියට හැදුවේ නැත්තම් සිංහල පේන්නේ මෙන්න මෙහෙම.

වැඩේ සරලව මෙහෙමයි:

බ්‍රවුසරය විවෘත කර ලිපින තීරයේ (Address Bar) "config:" (පෙරළි කොමා විරහිතව) ලෙස ලියා "Go" බොත්තම ඔබන්න.

දැන් ලැබෙන තිරයේ පහළටම ගිය විට "Use bitmap fonts for complex scripts" යනුවෙන් පරාමිතියක් (Parameter) ඇත.

එය ක්ලික් කර එහි ඇති "No" වෙනුවට "Yes" කියා ලබා දෙන්න.

දැන් "Save" බොත්තම ඔබා ඔබගේ සැකසුම තහවුරු කරන්න.

ඔන්න වැඩේ හරි. දැන් තියෙන්නේ ඉතිං වැඩද කියලා බලන එක තමයි. මේ තියෙන්නේ මගේ බ්‍රවුසරයේ කලින් කොටු කොටු තිබුණ සටහන.

 

එහෙනම් ඔයාලත් කරලා බලලා කියන්නකො වැඩේ කොහොමද කියලා.

හිම දිවියා නොහොත් Snow Leopard

සිරස්තලය දැක්ක ගමන් නම් හිතෙන්නේ මම මේ සතෙක් ගැන කථා කරන්න යනවා කියලා නේද? හැබැයි මෙහෙයුම් පද්ධති ගැන ඇහැ ගහගෙන ඉන්න කෙනෙක් නම් දන්නවා මම මේ මොකක්ද කියන්න යන්නේ කියලා. ඒ මොකද ඒ නම මේ දවස්වල සෑහෙන කියවෙන එකක් නිසා.

ඇපල් සමාගම ගැන නම් ඉතින් අමුතුවෙන් කියන්න ඕන නැහැනේ. ඒක කිව්ව ගමන් කාටත් එකපාරටම මතක් වෙන්නේ ඇපල් අයිෆෝන් එක. අන්න එතකොට නම් මතක් වුනා නේද මේ දිවියා ගැන? ඒත් නැද්ද? හරි හරි එහෙනම් මම ම කියන්නම්කෝ. ඔයාලා හැමෝම දන්නවනේ ඇපල් සමාගමේ සුප්‍රසිද්ධ මැක් පරිගණක (Mac Computers) ගැන. අන්න ඒ පරිගණක වලට ඇවිත් තිබුන මැක් ඕඑස් එක්ස් (Mac OS X) කියන මෙහෙයුම් පද්ධතියේ අලුත්ම සංස්කරණය (10.6) තමයි මේ "හිම දිවියා" නැත්නම් "Snow Leopard" කියලා කියන්නේ. මේ තියෙන්නේ පරණ මැක් ඕඑස් එක්ස් සංස්කරණයක තිර රූපයක්.

සංස්කරණය 10.5 "දිවියා" නොහොත් "Leopard"

මෙම "Snow Leopard" මෙහෙයුම් පද්ධතිය නිකුත් වෙලා තියෙන්නේ 2009 අගොස්තු 28 දිනයේ. ඇත්තෙන්ම මෙය Mac OS X මෙහෙයුම් පද්ධති වල 7 වන ප්‍රධාන නිකුත් කිරීමයි. මේකේ ප්‍රධාන වෙනස්කම් තමයි.

1. නව පෙනුම.
2. ස්ථාපනයේ, පණ ගැන්වීමේ සහ නිවා දැමීමේ වේගයත් භාවය.
3. අඩු ඉඩ ප්‍රමාණය (මෙය Leopard පද්ධතියට වඩා 7GB ප්‍රමාණයකින් අඩු බවයි පැවසෙන්නේ)
4. නව ආරකට වීන අකුරු ලිවීමේ ක්‍රමය. ට්‍රැක්පෑඩ් එක මත කෙලින්ම අකුර ලියන්න පුළුවන්. චීන වගේ භාෂාවකට එහෙම ක්‍රමයක් නැති වුනාම තියන අමාරුව ඉතින් කියන්න අවශ්‍ය නැහැනේ.
   
   
   
   
5. 64bit තාක්ෂණය

මෙවැනි තවත් නව වෙනස්කම් බොහොමයක් ඇති මෙම මෙහෙයුම් පද්ධතියේ අලෙවිය දැනටමත් කලින් පද්ධතියේ (Leopard) අලෙවිය මෙන් දෙගුණයක් සහ ඊටත් කලින් පද්ධතියේ (Tiger) අලෙවිය මෙන් හතර ගුණයක් බව තමයි පැවසෙන්නේ.

ඉතින් මෙම පද්ධතියේ මිල තමයි $29. හරි ලාභයි වගේ නේද අනෙකුත් පද්ධති එක්ක සලකද්දි? මේ මිලට ඔබට ලැබෙන්නේ ඔබ කලින් පද්ධතියකින් උසස් වීමක් ලබා දෙනවා නම් විතරයි. ඒක තමයි සාපේක්ෂව මේ ගාන අඩු. මොකද මේ පද්ධති වැඩ කරන්නේ විශේෂ ඇපල් දෘඩාංග මත. ඒක නිසා කෙනෙක් ලඟ දැනට තියන අයිබීඑම් අනුකූල (IBM Compatible) පරිගණක වල ක්‍රියාත්මක කරන්න බැහැ (නීත්‍යානුකූල ලෙස ස්ථාපනය කරන්නේ නම්). ඉතින් ඔබට අලුත් ඇපල් පරිගණකයක් ගැනීමට සිද්ධවෙනවා දැනට ඔබ ලඟ එකක් නැත්නම්.

කෙසේ වෙතත් ඇපල් මැක් පද්ධති පදනම් වෙලා තියෙන්නේ යුනික්ස් (UNIX) සහ බීඑස්ඩී (BSD) කියන පද්ධති (ලිනක්ස් වල පදනමත් යුනික්ස්) මත නිසා වින්ඩෝස් වලට වඩා නම් ගොඩාක් ඉදිරියෙන් තියනවා කියන එකට සැකයක් නැහැ. ඒ වගේම ආකර්ෂණීය දෘඩාංගත් ඇපල් සඳහා පවතිනවා. ප්‍රධානම එක තමයි ලැප්ටොප් පරිගණක වල තියන ට්‍රැක් පෑඩ් එක. ඒක අනෙක් සාමාන්‍ය ට්‍රැක් පෑඩ් වලට වඩා තරමක් විශාලයි. බහු-ස්පර්ශ සංවේදීතාවය (Multi-touch) තමයි වඩාත් ලගන්නා අංගය. එහිදී ඔබට රූපයක් කැරකැවීම, හැරවීම, විශාල කිරීම වගේ දෙවල් ඇඟිලි දෙකක් උපයෝගී කරගෙන කරන්න පුළුවන්. පහළ තියන වීඩියෝවේ තියෙන්නේ ඒ ගැන නිරූපණයක් (Demonstration).

ඉතින් මේ ආකාරයට විස්තර කියන්න ගියොත් නම් කෙලවරක් නැති දෙවල් හිතට එනවා. ඔයාලම ගිහිල්ලා බලන්නකෝ ඇපල් වෙබ් අඩවියට තව අලුත් දෙවල් මොනවද තියෙන්නේ කියලා.

වෙබ් අඩවිය

ඇපල් මැක් ඕඑස් එක්ස් (Apple Mac OS X) - Snow Leopard

ඔපෙරා මිනි මොබයිල් බ්‍රවුසරය 5 වන සංස්කරණය (Operan Mini Mobile Browser V5)

ඔපෙරා මිනි මොබයිල් බ්‍රවුසරය ගැන නම් ඉතිං මම අමුතුවන්ම කට්ටියට කියන්න ඕන නැහැනේ. මොකද ඒ තරම්ම මේ බ්‍රවුසරය ජංගම දුරකථන ඇතුළු අනෙකුත් ජංගම උපාංග (PDA වගේ උපාංග) භාවිතා කරන්නන් අතර සෑහෙන ජනප්‍රිය නිසා. මේකට ප්‍රධාන හේතු තමයි,

1. ජාවා මත පදනම් වීම - මේක නිසා ගොඩාක් උපාංග මත ක්‍රියාත්මක වෙනවා.
2. පහසු අතුරු මුහුණත (interface) - බ්‍රවුස් කරන්න ගොඩාක් පහසු විදියට සකසලා තියෙනවා.

ඉතිං මේක නිසා ගොඩාක් දෙනෙක් පුරුදු වෙලා තියෙන්නේ තමන්ගේ උපකරණයට ආපු ප්‍රධාන බ්‍රවුසරයටත් වඩා මේ ඔපෙරා එක භාවිතා කරන්න.

මම ඇත්තේන්ම කියන්න සැරසුනේ මේ කියන සුප්‍රකට බ්‍රවුසර නිර්මාතෘ වරුත් තවත් අලුත් සංස්කරණයක් ඉදිරිපත් කරලා තියනවා සංස්කරණය 5 ලෙසින්. දැනෙට මේකට ලැබිලා තියන ප්‍රතිචාර නම් ඉතාමත් හොඳයිලු. දැනට තියෙන්නේ බීටා සංස්කරණයක්. ඒ කියන්නේ පරීක්ෂණ අවසන් අදියරේ. කොහොමහරි ප්‍රවෘත්තිය අහපු ගමන් මම නම් දෙපාරක් හිතුවේ නෑ ස්ථාපනය කරා මගේ ජංගම දුරකථනයේ. මොකද මේ වෙනකොටත් මම ඔපෙරා 4.2 සංස්කරණය භාවිතා කර කර හිටියේ.

ෂහ්!!! බලාපොරොත්තුවෙන් හිටපු ගොඩාක් අංග එකතු වෙලා. එක් ප්‍රධාන එකක් තමයි "tab browsing". හරියට පරිගණකයේ ගිනි හිවලාගේ වගේ අවශ්‍ය ටැබ් එක ලස්සනට තෝරන්න පුළුවන්. තවත් අංග ගොඩායි,

1. Password Manager - මුරපද පාලකය
   
2. Speed Dial - වේග මුහුණත
   
3. Power Scrolling - පිටුවක පහළට යනකොට ලස්සනට පිටුව පහළට ඇදිලා යනවා. ස්පර්ශ සංවේදී උපකරණයක් නම් තමයි මේක ගොඩාක් වැදගත් වෙන්නේ.
   
4. Touch & Keypad - ස්පර්ශ සංවේදී දුරකථන වලට ගැළපීම සහ තිරය මත දිස්වන යතුරුපුවරුව
   
5. Google Searchbox - ගිනි හිවලාගේ දකුණු පස ඇති ආකාර ගූගල් සොයනය

ඉතිං මේ විදියට ගොඩාක් අංග එක්රැස් කරලා තමයි Opera Mini 5 සංස්කරණය නිර්මාණය කරලා තියෙන්නේ.

කෙසේ වෙතත් කීප දෙනෙක් කිව්ව විදියට ලොකු තිර නැති දුරකථන වල නම් නැත්නම් උපකරණ වල සහ බලය අඩු උපකරණ වල ටිකක් භාවිතය අපහසුයි කියලා. ඒක වෙන්න පුළුවන්, මොකද අතුරු මුහුණත තරමක් සංකීර්ණ නිසා වගේම ඒකට උපකරණයේ මතකයත් (උදා: Ram) බලපාන නිසා. හැබැයි ඒ ගැන තීරණය කරන්න ඔයාලට මෘදුකාංගය දාලම බලන්න වෙනවා.

මේ තියෙන්නේ Nokia 5800 XpressMusic වල ඔපෙරා මිනි 5 ධාවනය වෙන අයුරු දැක්වෙන සටහන් කීපයක්. මමත් තවම මේක භාවිතා කරන්න ආරම්භ කරා විතරයි. ඒ නිසා මේ සටහනේ තියන අඩුපාඩු පොඩි කමෙන්ට් එකකින් සම්පූර්ණ අමතක කරන්න එපා.

ඔපෙරා මිනි 5 ලබාගන්න මෙතැන ක්ලික් කරන්න

ඔපෙරා මිනි 5 නොකියා 5800 එක්ස්ප්‍රෙස්මියුසික් මත (On Nokia 5800 XpressMusic):

ටැබ් බ්‍රවුසිං - Tab Browsing

 

ස්පීඩ් ඩයල් - Speed Dial

ගූගල් - Google

 

තිරය මත යතුරුපුවරුව - Onscreen Keyboard 

ගූගල් - වෙඩ් අඩවි සොයන්න

ගූගල් - පිංතූර සොයන්න

සිංහල බ්ලොග් කියවන්න

 සිංහල බ්ලොග් කියවන්න

(හරියටම යුනිකෝඩ් වැඩ නෑ. ඒත් කියවන්න බැරි කමක් නෑ :))

මෙනුව

ලිනක්ස් වල රූට් (Root) රහස්‍ය කේතය වෙනස් කරගන්නා සැටි.

ලිනක්ස් ගැන මීට කලිනුත් මම ලියලා තියනවනේ විස්තර. අද කථා කරන්න යන්නේ ටිකක් ආකර්ෂණිය මාතෘකාවක් ගැන. ඒ තමයි ලිනක්ස් වල රූට් රහස්‍ය කේතය (root password) අමතක වුනොත් කරන්නේ මොකක්ද කියන එක.

ලිනක්ස් වල රූට් කියලා කියන්නේ "god of the system" කියලා කිව්වාට වරදක් නැහැ. මොකද මෙහෙයුම් පද්ධතියේ පූර්ණ බලතල තියෙන්නේ මෙම රූට් කියන පරිශීලකයාට (user) වන නිසා. ලිනක්ස් පද්ධතිය කෙතරම් නම්‍යශීලීද කියනවා නම් රූට් පරිශීලකයාට ඕනෑම දෙයක් රිසි පරිදි වෙනස් කරන්න පුළුවන් වගේම යම් දෙයක් අවබෝධයකින් තොරව වෙනස් කළහොත් නැවත පණ ගැන්වීමකදී පද්ධතිය ක්‍රියාත්මක නොවී තියෙන්නටද පුළුවන. (මෙය මෙහෙයුම් පද්ධතියේ වරදක් නොව භාවිතා කරන්නාගේ අතපසුවීමක්/වරදක් බව ඔබ තේරුම් ගත යුතුය.)

ඉතිං දැන් මේ රූට් රහස්‍ය කේතය අමතක වුනොත් මොකද වෙන්නේ? පද්ධතියේ පාලනය අවශ්‍ය පරිදි කළ නොහැකි වෙනවා. එනිසා මෙම රහස්‍ය කේතය වෙනස් කරන්නට ක්‍රමයක් තියනවා නම් කොතරම් හොඳ දැයි ඔබට සිතෙන්නට පුළුවන්. පළමුවෙන්ම කිව යුතු දෙය තමයි, නිවැරදි ලෙස ආරක්ෂණ ක්‍රියාමාර්ග (Security Measures) ගෙන තිබේ නම් මෙම ක්‍රියාව (රහස්‍ය කේතය වෙනස් කිරීම) එතරම් පහසු දෙයක් නොවන අතරම සමහර විට කළ නොහැකි දෙයක් බවට පත් වන්නටද පුළුවන. නමුත් අප සලකන්නේ ඔබගේම පුද්ගලික පරිගණකයක් නම් මා මේ හඳුන්වා දෙන්නට යන ක්‍රමය එතරම් අපහසු නොවනු ඇත.

අවශ්‍ය දෑ:

1. පළමු පණ ගැන්වීමේ උපකරණය (First Boot Device) සීඩී හෝ ඩීවීඩී ධාවකය වීම හෝ එය BIOS මගින් වෙනස් කිරීමට ඔබට හැකියාව තිබීම. BIOS වැඩසටහන පරිගණකයෙන් පරිගණකයට (එහි BIOS මෘදුකාංගය අනුව) වෙනස් වන අතර සාමාන්‍යයෙන් පණ ගැන්වීමේ උපකරණය "Boot Setting" යන මෙනුව තුළ "Boot Device" හෝ "Boot Sequence" යන උප මෙනුව යටතේ පවතී.
   
2. උබුන්ටු, ලිනක්ස් මින්ට් හෝ ඔබ කැමති ලිනක්ස් ලයිව් සීඩී (Live CD) එකක්. (විස්තර කිරීම සඳහා ලිනක්ස් මින්ට් භාවිතා වේ.

ක්‍රමය:

1. පළමු පණ ගැන්වීමේ උපකරණය සීඩී හෝ ඩීවීඩී ධාවකය නම් ඔබගේ ලයිව් සීඩී එක යොදා පරිගණකය එමගින් පණ ගන්වන්න.
   
   
   
2. දැන් ලිනක්ස් ඩෙස්ක්ටොප් එකට ආ පසු (After loading everything) රූපයේ පරිදි ඩෙස්ක්ටොප් එක මත රයිට් ක්ලික් කර එන මෙනුවේ "Open in Terminal" තොරන්න. ලැබෙන Terminal එකෙහි පහත රූප වලින් දැක්වෙන අයුරු පිළිවෙලින් විධානයන් ලබා දෙන්න. විධාන සියල්ල ලබා දිය යුත්තේ පෙරළි කොමා විරහිතවය.
   
   
   
   
3. "sudo fdisk -l" මෙමගින් ඔබගේ දෘඩ තැටියේ ලිනක්ස් ස්ථාපනය කර ඇති බෙදුම (Partition) හඳුනා ගත හැක. රූපයේ නම් එය /dev/sda2 වේ.
   
   
   
    
     
4.  දැන් නව ගොනුවක් තනා ගැනීම සඳහා මෙම විධානය ලබා දෙන්න. "sudo mkdir /media/temp". එවිට /media යන ස්ථානයේ temp නමින් ගොනුවක් සෑදේ.
   
   
   
     
5. දැන් කළ යුත්තේ අදාළ බෙදුම temp යන ස්ථානයට ආරූඪ (mounting) කිරීමයි. ඒ සඳහා මෙම විධානය යොදා ගන්න. "sudo mount /dev/sda2 /media/temp"
   
   
   
   
6. ඉන් පසු කළ යුත්තේ මෙම ලිනක්ස් සහිත බෙදුම "root partition" එක හැටියට මෙහෙයුම් පද්ධතියට හඳුන්වා දීමයි. රූපය බලන්න. විධානය, "sudo chroot /media/temp"
   
   
   
   
7. දැන් අවසන් අදියර, කරන්න තියෙන්නේ රහස්‍ය කේතය වෙනස් කිරීම. රූපයේ පරිදි "passwd root" විධානය ලබා දෙන්න. දැන් ඔබට අවශ්‍ය රහස්‍ය කේතය ඇතුල් කළ පසු නැවතත් එයම ඉදිරිපත් කරන්න. අවසානයේ, "passwd: Password updated successfully" යනුවෙන් ලැබෙනු ඇත.
   
   
   
   

දැන් ඉතිං කරන්න තියෙන්නේ පරිගණකය නැවත පණ ගන්වන එක. රූට්  රහස්‍ය කේතය භාවිතා කරලා ලොග් වෙන්න. මේක රූට් රහස්‍ය කේතය විතරක් නෙවෙයි, ඕනෑම පරිශීලකයෙකුගේ රහස්‍ය කේතයක් වෙනස් කරන්න පුළුවන් ක්‍රමයක්. උදාහරණයක් විදියට, guest_user කියන පරිශීලකයාගේ රහස්‍ය කේතය වෙනස් කරන්න නම් 7 වන අදියරේදි  "passwd guest_user" කියන විධානයයි භාවිතා කළ යුත්තේ.

සිම්බියන් ඕඑස් සහ එහි 9.4 සංකරණය 5 (Symbian OS 9.4 rel.5)

සිම්බියන් යනු නොකියා ස්මාට්ෆෝන් නැතනම් "Smartphone" දුරකථන වල භාවිතා වන මෙහෙයුම් පද්ධතියයි. මෙය ක්‍රමයෙන් විකාශනය වූ පද්ධතියක් වන අතර අද වන විට සිම්බියන් ඕඑස් 9.4 වල පස් වන සංස්කරනය බොහෝ දුරකථන නිෂ්පාදකයින් විසින් භාවිතා කෙරෙයි. තවදුරටත් එය ජනප්‍රිය වෙමින් පවතින්නේ එය අඩංගුව නිකුත්වන දුරකථන භාවිතයේ පහසුව නිසාය.

මීට පෙර සිම්බියන් මෙහෙයුම් පද්ධති භාවිතා වුනේ නොකියා දුරකථන වල පමණක් වුනත් පළමුව කිව්වා වගේ දැන් නම් මෙම තත්වය වෙනස් වී තිබෙනවා. ඒ මොකද සිම්බියන් මෙහෙයුම් පද්ධතිය දැන් නිදහස් සහ විවෘත මෘදුකාංගයක් (Free and Open Source Software - FOSS) වන නිසා. මෙනිසා ඕනෑම කෙනෙකුට අවශ්‍ය පරිදි එය භාවිතා කරන්න පුළුවන් තමන්ගේ උපකරණ සමඟ. මෙනිසා තමයි සැම්සුං, සෝනි එරික්සන් වැනි අනෙකුත් සුප්‍රසිද්ධ දුරකථන නිෂ්පාදකයින් දැන් මෙම මෙහෙයුම් පද්ධතිය භාවිතයට යොමු වී තිබෙන්නේ.

එයට හේතු:
පළමුවෙන්ම කිව්වොත් සිම්බියන් කියන්නේ නොකියා සමාගම විසින් මූලිකව භාවිතා කරන ලද මෙහෙයුම් පද්ධතියක්. මෙනිසා මෙයට එක් වී සිටින භාවිතා කරන්නන්ගේ (User Community) ප්‍රමාණය ඉතාමත් ඉහළයි. ඒ වගේම තමයි මෘදුකාංග සංවර්ධකන් ද (Software Developers) ප්‍රමාණයෙන් අති විශාලයි. ඉතින් එතකොට මොකද වෙන්නේ?

1. ඉතා විශාල මෘදුකාංග සංඛ්‍යාවක් අන්තර්ජාලයෙන් සොයා ගත හැක. (Software Availability)
   
2. ඉක්මනින් අවශ්‍ය උදව් ලබා ගත හැක. (Community Help)
3. ඉක්මනින් වැරදි නිවැරදි කිරීම - විශාල ප්‍රජාවකින් සමන්විත නිසා මෘදුකාංග වල පවතින වැරදි ඉක්මනින් හඳුනා ගැනීමත් එයට පිළියම් යෙදීමත් සිදුවෙයි (Software Updates)
   
4. භාවිතයට පහසු අතුරුමුහුණතක් තිබීම. (User-Friendly Interface)

නොකියා 5800 එක්ස්ප්‍රස් මියුසික් යනු නොකියා සමාගමේ පළමු ස්පර්ශ සංවේදී දුරකථනයයි. පළමු වරට Symbian OS v9.4, Series 60 rel. 5 කියන සිම්බියන් මෙහෙයුම් පද්ධතිය භාවිතා කළේ මෙම දුරකථනයටයි. සමහර වෙලාවට මෙය Symbian OS v5 (සිම්බියන් ඕඑස් වර්ෂන් 5) කියලත් හඳුන්වනවා. එය ස්පර්ශ සංවේදී දුරකථන සඳහා විශේෂයෙන්ම නිපදවන ලද සිම්බියන් මෙහෙයුම් පද්ධතියකි. මෙම මෙහෙයුම් පද්ධතිය භාවිතා කරන දුරකථන,

දැනට වෙළඳපලේ පවතින (නිකුත් වූ දින පිළිවෙලට),

1. නොකියා 5800 එක්ස්ප්‍රස් මියුසික් (Nokia 5800 XpressMusic) - 2008 නොවැම්බර්
   
2. සැම්සුං අයි8910 ඔම්නියා එච්ඩී (Samsung i8910 Omnia HD) - 2009 මැයි
   
3. නොකියා එන්97 (Nokia N97) - 2009 ජුනි
   
4. නොකියා 5530 එක්ස්ප්‍රස් මියුසික් (Nokia 5530 XpressMusic) - 2009 අගොස්තු

වෙළඳපලට නිකුත්විමට නියමිත (ප්‍රසිද්ධ කළ දින පිළිවෙලට),

1. සෝනි එරික්සන් සේෂෝ - අයිඩෝවූ (Sony Ericsson Satio - Idou) - 2009 පෙබරවාරි
2. නොකියා 5800 නැවිගේෂන් එඩිෂන් (Nokia 5800 Navigation Edition) - 2009 අගෝස්තු
3. නොකියා එන්97 මිනි (Nokia N97 Mini) - 2009 සැප්තැම්බර්
4. නොකියා එක්ස්6 (Nokia X6) - 2009 සැප්තැම්බර්

මෙම සියලුම දුරකථන වල භාවිතා වන්නේ ඉහත සඳහන් මෙහෙයුම් පද්ධතිය වුවත් එක් එක් දුරකථනයේ වින්‍යාසය (Configuration) නම් පැහැදිලි ලෙසම වෙනස් වේ. නමුත් මෙම පද්ධතිය සඳහා ආර්ම් සකසනයක්ම (ARM Processor) අවශ්‍ය වෙන බව තමයි කියවෙන්නේ. (වැඩි විස්තර)

මෙකී නොකී තවත් බොහෝ හේතූන් නිසා ක්‍රම ක්‍රමයෙන් "ස්මාට්ෆෝන්" සඳහා වූ මෙහෙයුම් පද්ධති වලින් සිම්බියන් ඕඑස් ඉහළට ඒම වළක්වනු නොහැකි වනු ඇත. එය නිදහස් සහ විවෘත මෘදුකාංගයක් කිරීම ඒ සඳහා මං පෑදු ප්‍රධාන සාධකයක්ද වන්නේය.

ස්විට්සර්ලන්තය සහ අත් ඔරලෝසු

ස්විස් කියන්නේ යුරෝපයේ සුප්‍රසිද්ධ, ස්විට්සර්ලන්තය කියන ලස්සන කුඩා රටට ලැබිලා තියෙන කෙටි නම. ස්විට්සර්ලන්තය ලංකාවටත් වඩා කුඩා රටක් කියන එක සමහර විට ගොඩක් අය නොදන්නවා වෙන්න පුළුවන්. එහි වර්ග ප්‍රමාණය ප්‍රමාණාත්මකව කිව්වොත් වර්ග කිලෝමීටර 41,290 කින් සමන්විත බිම් කඩකි. ලංකාවෙහි එම ප්‍රමාණය වර්ග කිලෝමීටර 65,610 කි. එනම් ලංකාව ස්විට්සර්ලන්තයට වඩා වර්ග කිලෝමීටර 24,320 ක් විශාල වෙයි.

ස්විස් වටවී ඇත්තේ බටහිර යුරෝපයේ ප්‍රසිද්ධ රටවල් වන ප්‍රංශය, ජර්මනිය, ඔස්ට්‍රියාව සහ ඉතාලිය යන රටවල් හතරෙනි. පෙනෙන අන්දමින් නම් ස්විට්සර්ලනතයටම උරුම වූ භාෂාවක් නැතිවා ‍වගෙයි. මොකද මෙහි ප්‍රධාන එහෙමත් නැත්තම් රාජකාරී භාෂාවන් විදියට සැලකෙන්නේ ජර්මන් බස, ප්‍රංශ බස, ඉතාලි බස සහ රුමේනියානු බසත්ය. භාෂා වල නම් ඒ ආකාරයෙන් වුවන් ඇත්තෙන්ම ස්විට්සර්ලන්තයේ භාවිතා වන්නේ එම භාෂාවන්හි උප භාෂාවන්ය. ඉංග්‍රීසියෙන් එය "dialect" කියා හඳුනවයි.

ස්විට්සර්ලන්තය කියූ පමණින් කෙනෙකුට සිතට එන්නේ චොකලට් සහ ඔරලෝසු. ඒ තරම් ම ඒවායේ ප්‍රමිතිය ඉහළ බැවිනි. ප්‍රමිතිය මෙන්ම මිල ගණන්ද ඉහළ බව දැන ගන්නට සහ විඳින්නට ඒ රටටම යා යුතු යැයි තමා මගේ හැඟීම. අත් ඔරලෝසු ගැන කථා කළහොත්, රු. 10,000 සිට රු. ලක්ෂ 30-40 දක්වා වූ විශාල පරාසයක අත් ඔරලෝසු ස්විට්සර්ලන්තයේදී ඔබට දැක ගන්නට පුළුවන්. විවිධ වූ අත් ඔරලෝසු වර්ග ස්‍විට්සර්ලන්තයේ නිපදවනු ලැබෙයි. ‍රොලෙක්ස්, රාඩෝ, චොපාර්ඩ්, කැල්වින් ක්ලේන්ල ස්විස් මිලිටරි, ස්වොච් වැනි අනර්ඝ නාමයන් සහිත අත් ඔරලෝසු ස්විස් අත් ඔරලෝසු සාප්පුවන්හි සුලභව දැක ගත හැකිය. පහත රූප පෙලෙහි විවිධ මිල ගණන් වල ස්විස් අත් ඔරලෝසු ඔබට දැකිය හැකිය. ඒවායෙහි මිල ගණන් ඇත්තේ ස්විස් ෆෑන්ක් වලිනි. එම මිල 107න් (2009 අගෝස්තු 31 වන දින විනිමය අනුපාත අනුව) ගුණ කල විට රුපියල් වලින් මිල ලැබෙනු ඇත.

ලැප්ටොප් පරිගණකය

මගේ ලැප්ටොප් පරිගණකයේ උෂ්ණත්වය ටිකෙන් ටික ඉහළ යනවා දැක්කම මට ඒක ඒ තරම් සුභ ලකුණක් කියලා හිතුනෙ නෑ. ඉතින් අත් දෙක බැඳගෙන ඉදලා පරිගණකයේ අවසන් කාලය දකිනවට වඩා ඒක ගලවලා බලලා මොකද වෙලා තියෙන්නේ කියලා බලන එක හොඳයි කියලා හිතුණා. ලැප්ටොප් ගැලෙව්වේ පළවෙනි පාරට නොවන බව නම් මේක බලන සමහර කෙනෙක් දන්නවා වෙන්නත් පුළුවන්.

ඩෙස්ක්ටොප් පරිගණකයක් වගේ නෙවෙයි ලැප්ටොප් පරිගණකයක් ගලවනකොට හරිම පරිස්සම් වෙන්න ඕන මොකද පොඩි වැරදීමකින් හරි කොටසකට පලුද්දක් වුනොත් මුළු මවු පුවරුවම අපතේ ගියා වෙන්න පුළුවන්. ඒකට හේතුව බොහෝ දුරට හැම දේම මවු පුවරුවටම සංයුක්ත කරලා ලැප්ටොප් පරිගණක හදන නිසා (හැබැයි මෙතනදි අපිට රැම් කාඩ් සහ හාඩ් ඩිස්කය අයින් කරන්න පුළුවන් වෙනම). මෙහෙම සංයුක්ත කරලා හදන්න හේතුව තමයි ඉඩ ඉතුරු කර ගැනීම. අර කලින් කිව්ව රැම් සහ හාඩ් ඩිස්කය ගලවන්න පුළුවන් විදියට හදලා තියෙන්නේ කෙනෙකුට "Upgrade" කිරීමක් අවශ්‍යයි කියලා හිතුනොත් පහසු වෙන්න.

කොහොමින් කොහොම හරි දැන් ඔක්කොම ගැලෙව්වා. දූවිල්ල හෝ ගාලා. මෙහෙ ඉතිං ස්විස් වගේ නෙවෙයිනේ.
මවු පුවරුව අරගෙන හොඳට සුද්ධ පවිත්‍ර කළා. ඉතින් කරලා ඕක ටිකක් අතේ තියාගෙන ඉන්නකොට හිතුණා පින්තූරයක් අරගෙන බ්ලොග් එකට දැම්මනම් මොකද කියලා. ඉතින් ඔන්න ඒ පින්තූර ටික.

ලිනක්ස් වල සිංහල රෙන්ඩර් වෙන හැටි

සිංහල යුනිකෝඩ් කියන එක දැන් කාටවත් අලුත් දෙයක් නෙවෙයිනේ. මේක බලනවා කියන්නේ ඉතිං දැනටමත් සිංහල යුනිකෝඩ් දාගෙන කියන එක :)

ඉතිං මම මෙතන කියන්න යන්නේ යුනිකෝඩ් දාන විදිය ගැන නෙවෙයි කියලා පැහැදිලියිනේ. එහෙනම් මොකක්ද කියන්න යන්නේ?

ඔය යුනිකෝඩ් අපි පරිගණකයේ ස්ථාපනය කරාම මෙහෙයුම් පද්ධතියෙන්නේ අපිට අකුරු පෙන්වන්නේ. ඒකට එක එක මෙහෙයුම් පද්ධතියේ තියන යාන්ත්‍රණ වෙනස්. මේ ක්‍රියාවලියට කියන්නේ "Text Rendering" (ටෙක්ස්ට් රෙන්ඩරින්) කියලා. උදාහරණයක් විදියට වින්ඩෝස් වල "Uniscribe" (යුනිස්ක්‍රයිබ්), ලිනක්ස් වල "Pango" (පැන්ගෝ) සහ මැක් වල "ATSUI" (අට්සුයි) සහ "Core Text" (කෝ ටෙක්ස්ට්) කියන යාන්ත්‍රණ එහෙමත් නැත්තම් "Text Rendering Machines" භාවිතා කරනවා.

මෙම යාන්ත්‍රණ අතුරින් ලිනක්ස් වල සිංහල ටෙක්ස්ට් රෙන්ඩරින් අනෙක් හැම මෙහෙයුම් පද්ධතියකටම (ඉහත සඳහන්) වඩා ඉතාමත් ඉහළින් තියනවා කියලා කියන්න පුළුවන්.

එහෙම කියන්නේ කොහොමද කියන එක ලිනක්ස් භාවිතා නොකරන කෙනෙකුට දැන් ප්‍රශ්නයක් වෙන්න පුළුවන් වගේම මාත් එක්ක අමනාපයක් ඇති වෙන්නත් පුළුවන්නේ. මෙන්න ඒකට සාක්ෂී. මම හරිද වැරදිද කියන එක ඔයාලම තීරණය කරන්නකෝ.

මේ තියෙන්නේ මගේ පරණ බ්ලොග් පොස්ට් එකක් එක එක මෙහෙයුම් පද්ධතියෙදි ගත්ත ස්නැප් ෂොට්ස්

ලිනක්ස් මින්ට් (Linux Mint) වල

ඇපල් මැක් ඕ.එස් එක්ස් (Apple Mac OS X) වල

මයික්‍රොසොෆ්ට් වින්ඩෝස් (Microsoft Windows) වල

ලිනක්ස් සහ මයික්‍රොසොෆ්ට් වින්ඩෝස්

වින්ඩෝස්, වින්ඩෝස්, වින්ඩෝස්... කොහේ බැලුවත් වින්ඩෝස්...
කවුද කියන්නේ? මොන පිස්සුද... වින්ඩෝස් වල කාලේ ඉවර වේගෙනයි එන්නේ...
මොනවද මේ බහුබූත?

ඇත්තෙන්ම වින්ඩෝස් ලොව ඇති එකම සහ හොඳම "Operating System" ("මෙහෙයුම් පද්ධතිය") එක කියා වැළඳ ගත් අයෙකුට නම් මේ ඉහත වැකි හිස් වචන පමණක්ම වනු ඇත. නමුත් ලිනක්ස් භාවිතා කරනා හෝ ඒ ගැන දන්නා අයෙකුට මෙය සත්‍යයකි. වින්ඩෝස් වල කාලය අවසන් වීම කෙසේ වෙතත් කොහේ බැලුවත් වින්ඩෝස් ද යන්න නම් මේ වනවිට සැලකිය යුතුම ප්‍රශ්නයකි.

වින්ඩෝස් යනු ඔබ අප කවුරුත් දන්නා Micro$oft ආයතනය මගින් නිපදවන ලද මෙහෙයුම් පද්ධතියකි. මෙහි නීත්‍යානුකූල භාවිතය සඳහා මුදල් ගෙවා ලබා ගත යුතු අතර එක් පිටපතක් බොහෝ විට භාවිතා කළ හැක්කේ එක් පරිගණකයක් මත පමණි. තවද අද බෙහෝ දෙනා ඉතා බහුලව භාවිතා කරන Micro$oft Office (Word, PowerPoint, Excel ඇතුළත් පැකේජය), Adobe Photoshop, Ahead Nero, යනාදී සියලු මෘදුකාංගයන් ද භාවිතා කල හැක්කේ මිළ දී ගෙන පමණි (නීත්‍යානුකූලව). නමුත් මෙම මෘදුකාංග ඉතා මිල අධික ඒවා වෙයි. උදාහරණයක් ලෙස මයික්‍රොසොෆ්ට් ඔෆිස් සැලකුව හොත් බොහෝ දෙනා භාවිතා කරන ඔෆිස් පොෆෙෂනල් 2007 සංස්කරණයෙහි මිල රු. 35,000/- ත් රු. 50,000/- ත් අතර වෙයි. එනම් ඔබ මයික්‍රොසොෆ්ට් වින්ඩෝස් නීත්‍යානුකූල ලෙස භාවිතා කරන්නේ නම් මෘදුකාංග සඳහා පමණක් ඔබ රු. 100,000/- කට වඩා වියදම් කළ යුතු වෙයි. එසේ වූ නමුදු ඔබ අප කවුරුත් දන්නා පරිදි බොහෝ දෙනා භාවිතා කරන්නේ "Pirated Softwares" නොඑසේ නම් "නීති විරෝධී මෘදුකාංග" යන්ය (ඔබ ලැප්ටොප් පරිගණකයක් භාවිතා කරන්නේ නම් බොහෝ විට නීත්‍යානුකූල වින්ඩෝස් පිටපතක් ඒ සමඟ ලැබේ).

"ඉතින් මොකද වෙන්නේ? අපි ගන්නේ තියන නිසානේ. අනික අපි මේක පාවිච්චි කරනවා කියලා බිල් ගේට්ස් (මයික්‍රොසොෆ්ට් ආයතනයේ නිර්මාතෘ) දැනගන්නද? අපිට දඩ ගහන්නද?"

මේ ආකාරයට තමයි මේ පිළිබඳව විස්තර කරන විට බොහෝ දෙනාගේ මතය වන්නේ. බිල් ගේට්ස්ගේ දැනගැනීම කෙසේ වෙතත් දැන ගත්තොත් දඩ ගැසීම නම් ඔහුට කළ හැකි දෙයකි. මකිනිසාද යත් වින්ඩෝස් ස්ථාපනය කරනා විට ඔබ එකඟ වන "End User Licence Agreement" නොහොත් EULA හි එකඟතාවන් ඔබ කඩ කර ඇති බැවිනි.

(ඉතිරිය පසුවට... එතෙක්, ලිනක්ස් ඩෙස්ක්ටොප් එකෙහි ඡායාරූප කිහිපයක්)

හොන්ඩා අකෝඩ් (Honda Accord) මොටර් රථය

හොන්ඩා යනු ලොව පිළිගත් මහා වෙළඳ නාමයකි. මෙම වෙළඳ නාමය මනසට ආ සැනින් මට සිහිවෙන්නේ වසර කිහිපයකට පෙර මාගේ පියා සතුව තිබූ අගනා Honda CM125 මොටර් බයිසිකලයයි. දැනුත් සිහිවන්නේ එය සතුව තිබූ ගාම්භීර පෙනුමත් පණ ගැන්වූ විට ඇති ගාම්භීර හඬත්ය.

ඇත්තේන්ම මා මේ සැරසෙන්නේ ‍මොටර් බයිසිකල් ගැන කථා කරන්නට නොව Honda Accord මොටර් රථය වෙනුවෙන් නිර්මාණය කර ඇති අගනා වෙළඳ දැන්වීමක් ඔබට රසවිඳින්නට සලසන්නටය. ඒ ගැන වැඩිදුර විමසන්නට ඔබට ඉඩ හරිමි.



වැඩිදුර...
Official Website
Wiki

පාලුවට ගිහින්...

දවසේ හරිය ‍බ්ලොග් සටහන පාලුවට ගිහින්. ලැප්ටොප් එකේ ලිනක්ස් පිහිටුවලා තිබුණු දෘඩ තැටියේ දෝෂයක් නිසා මට ආපහු වින්ඩෝස් වලට මාරු වෙන්න සිද්ධ වුණානෙ. වින්ඩෝස් වල සිංහල ටයිප් කරන එක මට එච්චර ඇල්ලුවේ නැහැ. ඒත් දැන් වෙන කරන්න දෙයක් නැහැ. දැනට වින්ඩෝස් පාවිච්චි කරනවා.

කොම්පියුටරයෙන් තවත් වැඩ

කොම්පියුටරය යනු ලොව මවිත කළ හැකි දේ කළ හැකි අගනා උපකරණයකි. එය ටයිප් රයිටයක් ලෙස කාලයකුත් බහුමාධ්‍ය උපකරණයක් ලෙස කාලයකුත් කා අතරත් මහත් ප්‍රසිද්ධියක් ඉසිලීය. කනගාටුවට කරුණක් වූයේ එය එම කර්තව්‍යයන් සඳහා පමණක් කෙනෙකු විටෙක සිතන්නට පෙළඹීමය. තාක්ෂණික දියුණුවත් සමග පරිගණකයේ තව තවත් වර්ණවත් පැති මිනිසාට දකින්නටත් විඳින්නටත් හැකි විය. එයින් එකක් නම් ඔබ අප කවුරුත් දන්නා අන්තර්ජාල තාක්ෂණයයි. නමුත් පරිගණකය අද නොමැති තැනක් නැති තරම්ය. ඔබගේ අගනා ඩිජිටල් ඔරලෝසුවේ සිට ගගණ සැරිසරණා සුවිසල් යානා වලට පරිගණක තාක්ෂණය නැතිවම බැරි දෙයකි.
නමුත් මම මේ සැරසෙන්නේ පරිගණක තාක්ෂණයේ හරබර දේ ගෙනහැර දක්වන්නට නොව පරිගණකය භාවිතයෙන් අකුරු ලියන්නටත් චිත්‍ර අදින්නටත් උපකාරයක් වන්නටය. "මේ මොන මගුලක් ද?" යි, ඔබ දැන් සිතනවාට සැක නැත. මක්නිසාද යත් ඔබ සියලු දෙන ඒ ගැන හොදාකාරවම දන්නා බැවිනි. මොහොතක් ඉවසන්න. මා මේ කියන්නට සැරසෙන්නේ යතුරුපුවරුව භාවිතයෙන් අකුරු ලියන්නටවත් මූසිකය (මවුසය) භාවිතයෙන් චිත්‍ර අඳින්නටවත් නොවේ.



ප්‍රථමයෙන් කිව යුත්තේ මා කලාකරුවෙකු නොවන බවයි. මේ සරල රූපයෙන් මා පෙන්වන්නට උත්සාහ කරන්නේ මා ඉහත සඳහන් කළ දෙයයි. මෙම චිත්‍ර අඳින්නටත් අකුරු ලියන්නටත් මා භාවිතා කර ඇත්තේ බොහෝ කලාකරුවන් අතර ප්‍රසිද්‍ධ නමක් වන "Wacom" නම් ආයතනය විසින් නිෂ්පාදිත "Bamboo Fun" යන උපකරණයයි. මෙහි සරල සැකැස්ම අපගේ පැරණි ගල් ලෑල්ලකට සමානය. ගල් කූර හා සැසඳිය හැකි පෑනකට සමාන උපකරණයක්ද එයට අයත් වේ.



මෙය භාවිතා කරමින් නිර්මාණශීලි කලාකරුවෙකුට පරිගණකයේ මැවිය හැකි දේ අනන්ත අප්‍රමාණ හා ඉතා සිත් ගන්නා සුළු වනු ඇත.
"වැකොම් බැම්බූ ෆන්"

න්‍යෂ්ටික විදුලි බලාගාරය

වලාකුළු සේ දසත විහිදෙන මෙම මහා ජල වාෂ්ප කඳ අහස පුරා පැතරෙන්නේ අලංකාර දසුනක් ලෙසය. අහිතකර වායූන් පිමවීමක් මෙහිදී සිදු නොවන බැවින් වඩාත් පරිසර හිතකාමී ලෙස විදුලි බලය නිපදවීමේ ක්‍රමය ලෙස මෙම බලාගාර බලධාරීන් පවසන්නේ ඉතාමත් සරල ලෙසය.

නමුත්, මෙහි කෙනෙතු නොදකිනා තවත් පැත්තක් වෙයි.


"Kernkraftwerk Leibstadt" ලෙස හැඳින්වෙන මෙම බලාගාරය ස්විට්සර්ලන්තයේ උතුරු ජර්මන්-ස්විස් දේශ සීමාව ඉතා ආසන්නයේ පිහිටා ඇත.
කර්න්ක්‍රාෆ්ට්වර්ක් ලීබ්ස්ටාඩ්ට් න්‍යෂ්ටික විදුලි බලාගාරය

හිම සීනු

සීත කාලය යනු විටෙක සීත ඉහලිය නොහැකි සමයකි. සුළං හමා යන කාලයක් වුවහොත් මෙය ඉතාමත් දරුණු වේ. ඔක්තෝබරයේ සිට පෙබරවාරි, මාර්තු දක්වා ඇදෙන සීත සමය නිම වනවිට එහි වැසියනටද ඉතා තෘප්තිකර කාලයක් උදා වේ. ගිම්හාන කාලයට කෙමෙන් කෙමෙන් පය තබන සොභා දහම නැවුම් බවක් පරිසරයට මෙන්ම අප සිතටද කාවද්දයි. ගිම්හාන කාලයත් සීත කාලය අවසන් වන සමයත් පරිසරයේ ඉමහත් වෙනසක් ඇති වන කාලයකි. කුඩා මල් පොළොවින් මතු වන්නේ තවත් පොළොව යට සැඟවී ගන්නට බැරුවා සේය.





මේ හිම සීනු නොහොත් "Snow Bells" ලෙස හැඳින්වෙන පොළොවෙන් ඉහළට මතුවන ඉතා කුඩා මල් වර්ගයකි. මැරී ගිය ගහ කොළ අතරින් මෙම මල් මතු වන්නේ ඇත්තෙන්ම නව සමයක උදාව කියාපාමිනි.

වැනසුම සහ නිපැයුම

දසත විසිරී ගිය තුරුලතා සිතටත් ගතටත් ගෙන එන්නේ කෙතරම් සිසිලක්ද... කාලයත් සමග මිනිසාගේ දියුණුවත් සමඟ ඔහු පරිසරය හා ගැටෙන්නට විය... එයින් පෙරලා පහර බැට කන්නේද මිනිසාම නොවෙද?



ඕනෑම දෙයක් නිපැයුමට ඉඩකඩ්ත් අමුද්‍රව්‍යත් අවශ්‍ය වේ. දෙකටම පරිසරය මුහුණ දෙයි. මෙම මාර්ග නිපැයුමත් පසෙකින් එකිනෙක අඩු වී යන ගසුත් එයට කදිම නිදසුනක් සපයයි. "මිනිසා පරිසරයටත් පරිසරය මිනිසාටත්" යන පැරණි වදන් නොව "පරිසරය මිනිසාට" යයි එය නිවැරදි කළ යුතු කාලය එළඹී ඇත...

අන්තර්ජාල වේගය

ලංකාවේ නම් අන්තර්ජාල වේගය ගැන විවාදයක් අවශ්‍ය නැත. එයට එක් හේතුවක් නම් අපගේ යටිතල පහසුකම් වල මද කමය. අනෙක ලංකාවේ අන්තර්ජාල භාවිතය 100% පැතිරී නොතිබීමත් කාර්යාලයීය කටයුතු (සියලු ක්ෂේත්‍ර වල) සහ එදිනෙදා කටයුතු පූර්ණ ලෙස පරිගණකය වටා ගොඩ නැගී නොතීබීමත් තවත් හේතු සාධක වේ.

යුරෝපය සංවර්ධිත රටවලින් යුතුය. අන්තර්ජාල භාවිතය 100% කීවාට වරදක් නැත. ඕනෑම ක්ෂේත්‍රයක පැයක පමණ අන්තර්ජාල අත්හිටුවීමක් සිදු වුවහොත් එම ආයතනයට සිදුවන පාඩුව අතිමහත් විය හැක.
උදාහරණයක් ලෙස ප්ලාස්ටික් බෝතල් නිපදවන ආයතනයක්(අ. යයි සිතම්) ගැන සිතන්න. වෙනත් පාරිභෝගික ආතනයකට(ආ.) බෝතල් 10000ක හදිසි ඇණවුමක් අවශ්‍යව ඇත. දැන් සෑම කටයුත්තක් සඳහාම ඊ-මේල් භාවිතා කිරීම සාමාන්‍ය දෙයකි. මෙනිසා අ. ආයතනයෙන් ආ. ආයතනය ඇණවුම සඳහා ඊ-මේල් පණිවුඩයක් යවයි. නමුත් අ. ආයතනයේ හදිසි දෝෂයක් නිසා පැයක/දෙකක පමණ අන්තර්ජාල පහසුකම අත්හිටවීක් සිදුවී ඇත. මෙනිසා ඉහත ඊ-මේල් පණිවුඩයට පිළිතුරක් නොලබන ආ. ආයතනය වෙනත් සපයන්නකු වෙත යොමු විය හැකිය. එය අ. ආයතනයට දීර්ග කාලීන පාඩුවක් වනු ඇත.

මෙනිසා සංවර්ධිත රටවල් අන්තර්ජාල පහසුකම් සඳහා බොහෝ සේ වියදම් කිරීම අරුමයක් නොවේ. කෙසේ වෙතත් මෙම හේතූන් නිසා අන්තර්ජාල වේගය ද ඉතා සිත්ගන්නා සුළු අතර ස්ථාවරද වේ. යම් කිසි වැදගත් විශාල ගොනුවක් බාගත කර ගැනීමට දවස් ගණන් බලා සිටිය යුතු නැත. මෙම වීඩියෝ දසුන එයට මනා නිදසුනක් වනු ඇත. :)


සූරික්, ස්විට්සර්ලන්තය

ආරක්ෂිත බිම් ගෙවල්

වරෙක මුළු ලොවම කම්පා කළ හිට්ලර් නම් අධිරාජ්‍යවාදී හිතැති පුද්ගලයා බිහි වූ ජර්මනියට යාබද එක් රටකි, ස්විට්සර්ලන්තය. එමෙන්ම එය මෙතෙක් කිසිදු රාජ්‍යයක් විසින් යටත් කර නොගත් කිසිදු පහරදීමකට ලක්නොවූත් රටකි. මෙනිසා ස්විස් වැසියන් එක්තරා මානයකින් යුතු පිරිසකැයි කීවාට වරදකුත් නැත. සමහර විටෙක දුක්මුසු අතීතයක් ජර්මනියට හිමි කළ හිට්ලර්ගේ වදන් පවා පිටරැටියන්ට එරෙහිව ඔවුන්ගේ මුවින් පිට වන්නේ ජර්මන් ජාතිකයන් පවා එයට වෛර කරන විටකය.

කෙසේ වුවද තමන්ගේ ආරක්ෂාව තමන්ම සලසා ගතහොත් හොඳ යයි සිතූ අතීත ස්විස් ජාතිකයන් ගොඩනැගිලි ඉදිකිරීමේදී එක්තරා නීතියක් පනවා තිබේ. එනම්, සෑම ගොඩනැගිල්ලකම අනිවාර්ය බිම් මහලක් තිබිය යුතු වීමයි. මෙහි දැක්වෙන්නේ එසේ තැනූ බිම් මහලක කොටසක දසුන් කිහිපයකි. ඒ හදිසි පහරදීමකදී තාවකාලිකව සැඟවී සිටිය හැකි ස්ථානයකි.


බිම් මහලේ එක් කොටසකට ඇතුළු වන අඩි බාගයක් පමණ පළලැති යකඩ රාමුවක් සහිත කොන්ක්‍රීට් දොර.

මෙහි බිත්තියක් අඩියකටත් වඩා පළලට තනා ඇති අතර හදිසි අවස්ථාවක් වුවහොත් මෙම ස්ථානයෙන් ඉවත් වීමට උමං මාර්ගයක් පවා තිබී ඇත.






වෙනත් ස්ථානයක් හා සම්බන්ධ වන උමං මග.